Язмалар исемлегенә күчү

Гайфулла АВЗАЛОВ: “Акча бәхет ул. Бәхетне бирергә ярамый”

– Исәнме, дустым! Нишләп йөрисең бу кибеттә?

– Менә, дачага китеп барыш. Казылык алырга кердем.
  
– Сайланасың. Синең өчен бәясе кыйбатмы әллә?

– Кыйбат түгел. Аллага шөкер, акча әйбәт килә миңа.

– Акчаны ничек эшлисең? Шоумен, тамада, җырчы, композитор да бит әле син...

– Мин күп юнәлештә эшлим. Хәзерге вакытта “инвес­тиция” (капитал салу) белән шөгыльләнәм. Гади тел белән әйткәндә, интернетта акча эшлим.

– Акчаны кайда сакларга хәзер? Бизнесмен буларак, син ничек уйлыйсың?

– Биткоиннарда сакларга кирәк.

– Биткоин нәрсә соң ул?

– Ул – криптовалюта. Күренми торган, интернет валютасы.

– Димәк, акча интернетта саклана булып чыгамы?

– Әйе.

– Ә көннәрдән бер көнне ул юкка чыкса? Курыкмыйсыңмы?

– Юк. Киләчәктә барысы да криптовалюта белән бәйле булачак.

– Бүгенге көндә акчаң күпме соң?

– Җитәрлек. Үзебезгә, гаиләгә җитә.

– Миңа да бирә аласыңмы?

– Бирә алмыйм.

– Ник алай? Син саранмы? Бай кеше саран була, диләр.

– Саран түгел, ләкин берсенә дә акча бирмим. Акча – бәхет ул. Бәхетне бирергә ярамый.

– Сиңа ул акчаны кире кайтаралардыр бит инде?

– Юк шул. Заманында биргә­ләгәнем булды. Алганда бик матур алалар, ә кире теләр-теләмәс кенә кайтаралар. Кайберләре бирми дә, аннан дошман булып каласың. “Дустыңны югалтасың килсә, бурычка акча бир”, диләр.

– Андый дусларың да бар идеме?

– Бар иде. Исемнәрен әйтеп тормыйм инде.
  
– “Килмә, килмә, йөремә”, дип җырлап йөргән Гайфулла Авзалов кайда хәзер?

– Кайда дип, күңелдә шулай ук калдым инде мин.

– Сәхнәдә күренмисең... Акчаң бар бит инде, фонограмма эшләтергә, җыр сатып алырга да була.

– Миңа җырны сатып алырга да кирәкми, үзем язам.

– Карчык кайда соң? Кибеттә берүзең йөрисең...

– Машинада утыра.

– Барып, аны да фотога тө­шереп алсам буламы?

– Ярамый. Ул бик тыйнак минем.

– Ә кем булып эшли?

– Эшләми. Минем белән бергә инде.

– Синең директорыңмы?

– Юк, мин аныкы.

***
Әңгәмә "Акчарлак" газетасының архив саннарыннан алынды, 11 январь 2018 № 1