Безгә 15 яшь
Россия буенча милли басмалар арасында иң зур тиражлы газета
Тираж — 35 000 экз.
“Бәллүр
каләм – 2013”тә
“Медиапроект” номинациясе
Язмалар исемлегенә күчү

Бирмим мин сиңа иремне!

10 Декабрь 2018 2017
И-и-и, күрде инде башкайлар! Тормыш дигәнең гел баштан гына сыйпап тормый шул, кайчакта артыңа да тибеп җибәрә. Менә шул чакта йә егылып каласың, йә бөтен көчеңне учыңа җыеп торып басасың да, тагын яшәү өчен көрәшә башлыйсың. Мине дә төртеп ега язды ул. Әмма авызымда кан булса да, кеше алдында төкермәдем, эчемдәге җан ярасын берәүгә дә күрсәтмәдем. Бөтен теш-тырнагым белән тартышып, барыбер үз дигәнемә ирештем, сынмадым-сыгылмадым.
Иремне тартып ала яздылар. Аның читкә йөрүен сизенә башлагач, эшендәгеләрдән сораштыра башладым. Берсе дә белми, сизми икән. Әмма хатын иренең гулять иткәнен белмиме соң! Соңыннан ачыкладым: эшләрендәге хисапчы белән типтерә икән, керәшен хатыны ди. Шуның кочагына кереп кайтуын белсәм дә, дәшмәдем, түздем. Ирем холыксыз кеше түгел, эчеп, котырып та йөрмәде. Теге хатын яныннан бәхетле булып кайта иде дә, ятып йоклый иде.

Шулай күп еллар буе иремнең сулга йөрүенә түзеп яшәдем. Бервакыт көндәшемнең юбилей үткәрәсен белдем. Иремне дә чакырган. Менә шул көнне иремә тавыш куптардым. “Бүтәннәр ирләре, хатыннары белән бара икән, нишләп син мине алып бармыйсың”, – дидем. Ирем аклы-күкле булды. Сөяркәсенең юбилеена ничек мине алып барсын инде ул?! Бәлки ул анда аның янында табын түрендә утырырга җыенган булгандыр. Тегенең ире юк бит! Ир ролен башкарасы булгандыр.

Ничек итсәм иттем, әмма бардым мин ул бәйрәмгә. Ирем тәмәке тартырга чыгып киткән арада теге керәшен хатыны янына барып утырдым. Теге сискәнеп китте, китмәкче булды. Кулыннан эләктереп алдым да: “Әйдә, утыр, сөйләшик. Мин сиңа иремне бирмим, аң бул!” – дидем. Сүз арасына сүгенү сүзләре дә куштым. Шулвакыт теге хатынның йөзе кап-кара булды. Бәйрәм рухы бетте, ул ахырга кадәр шулай күңелсезләнеп утырды.

Тәки бирмәдем иремне шул хатынга. Йөрделәр, йөрделәр дә, ташлаштылар. Аңа өйләнә торган ир кирәк булган, ә минеке безне ташламады. Тавыш чыгарсам, иремә акырсам, еласам, ул күптән чыгып киткән булыр иде. Ә мин түздем. Сабырлыгым аркасында иремне тотып калачагымны белдем. Ходай сезгә дә шундый сабырлыклар бирсен, хатыннар!

Зәмирә.

"Акчарлак" газетасы архивыннан, 2014 нче елның декабрь саныннан алынган хат.

Әлеге темага башка язмалар:

Безнең белән туры элемтә
Популяр язмалар
29 Август 2019 13:43 902
ӨСКӘ