Безгә 20 яшь
Россия буенча милли басмалар арасында иң зур тиражлы газета
Тираж — 35 000 экз.
“Бәллүр
каләм – 2013”тә
“Медиапроект” номинациясе
Язмалар исемлегенә күчү

Анна ПОПОВА: “Аерылгач, күп ирләр алимент түләргә теләми”

6 Октябрь 2020 770
– Анна, пародокс бит бу: юрист шундый матур шигырьләр яза!

– Юрист – коры профессия, төгәл­лек таләп итә. Әмма кеше нәрсә­дән­дер күңеленә ләззәт алырга да тиеш. Кемдер тәмле итеп пешерә, кемдер рәсем төшерә, тегә. Мин менә эзләгән хоббиемны таптым.

– Башта бу турыда уйламадыңмы?

– Юк. “Кечкенә чакта әллә нәрсәләр мыгырдап йөри, җырлый идең”, – дип әбиемнең әйткәне бар. Биш яшькә хәтле Питрәч районы Керәшен Сәр­дәсе авылында әбиләрдә тордым. Әти-әнием студент иде. Мәктәптә беренче тапкыр шигырь яздым. “Бишле”гә укып барсам да, шук идем. Аннары шигырь язулар мәктәп бусагасында калды. 2012 елда дискотекага җыр кирәк дигәч, утырдым да яздым. Беренче җырым – “Сине табам”. Аны Гөлназ Солтанова башкара.

– Популяр булу өчен нишлисең?

– Бөтен яңалыкларны белергә тиеш­сең: нинди яңа җырчы бар, кем­нәр нәрсә яза...

– Александр Розенбаум – врач. Со­ңын­нан врачлыкны ташлап, җырга кереп киткән. Син дә юристлыкны ташларга уйламыйсыңмы?

– Барысы да Алла кулында. Профессиям бик ошый. Кечкенәдән дөреслек эзләп йөрдем. Кешегә чын күңелдән булышам.

– Законны саклап яшәү авырмы?

– Минемчә, Россиядә бөтен законнар да тиешле дәрәҗәдә язылып бетмәгән. Кайберләрен ике вариантта укып була, бу якка да,теге якка да авыштырып. Кайбер очракта закон кешегә булышмый, каршы гына эшли шикелле. Ә кайбер законнар бер-берсе белән тоташмый, бер-берсенә ничектер каршы. Юристлар мине аңлар.

– Аны хәл итеп булмыймы?

– Юк. Аннары, кешеләр бүген үз хокук­ларын белми. Килеп терәлгәч кенә киләләр, әмма сроклары узган, әллә нинди документларга кул куеп бетергән булалар. Документка кул куйгансың икән, ул хәл ителгән дигән сүз инде.

– Син нинди юнәлештә эшлисең?

– Гражданнар, административ эшләр буенча. Күптән түгел Лаеш районы Янтык авылыннан шалтыраттылар. Әти­ләре үлеп киткән, йортны тартып та алырга мөм­киннәр, диләр. Нишләргә? Ир үлеп китсә – хатынның, хатын үлеп китсә – ирнең бу милеккә хокукы бар. Чиратта – балалары, аннары оныклары. Исән вакытында васыять язып калдырмаса, бу очракта йорт балаларга тигез итеп бүленә.

– Эшең бик катлаулы икән...

– Кайвакыт аерылышу процессы озак алып барыла. Аерылышканда гауга куба, сөйләшә алмыйлар. Бервакыт өч ай буе аерылыштылар, милек бүлеш­теләр, иң соңыннан дуслаштылар тагын.

– “Брачный контракт” популяр хәзер...

– Әйе, ләкин “брачный контракт” мөнә­сәбәтләрнең асылын бетерә, башта ук кеше бер-берсенә ышанмый башлый.

– Гаиләгә кагылышлы тагын нинди мәсьәләләр бар?

– Аерылулар күп, алимент темасы бик актуаль. Аерылганда да кеше булып калырга кирәк. Аерылгач, күп ирләр алимент түләргә теләми.

– Нигә?

– Ул акча хатынга китә, дип уйлыйлар. Аерылыштык, онытырга, ак биттән башларга кирәк, дип саныйлар шикелле.

***
Әңгәмә "Акчарлак" газетасының архив саннарыннан алынды, 10 октябрь 2019 № 40
Рубрика: ӘҢГӘМӘ Автор: ГАБДЕРӘХИМ

Әлеге темага башка язмалар:

Безнең белән туры элемтә
Популяр язмалар
19 Октябрь 2020 11:43 1930
28 Сентябрь 2020 13:16 1495
12 Октябрь 2020 09:36 1334
5 Октябрь 2020 10:16 1293
ӨСКӘ