АНОНС

Журналист Лилия Заһидуллина. “Үзем “Акчарлак” газетасы редакциясеннән чыгып китсәм дә, күңелем һаман шунда, берни эшләтеп булмый”, – ди Лилия. Шуңа күрәдер, аның иң тәмле, иң көчле, иң саллы язмалары да – нәкъ “Акчарлак” өчен язылганнары. Ул һәр мәкаләсен озаклап уйлап, матурлап, кат-кат укып, җиренә җиткерергә тырыша. Тизлек түгел, сыйфат артыннан куа. Сайланып, үзенең күңеленә хуш килгән темаларга гына алына. Тормышның матурлыгын күрә белик дияргә яратса да, мәкаләләренең күбесендә тәнкыйть ярылып ята. “Кыю мәкаләләр язсам, адреналин алам. Акча үзләштергән җитәкчеләрне сүгү – минем өчен текә аттракционда атыну белән бер”, – ди Лилия.