ЯШЬЛӘР МӘЙДАНЫ

“Акчарлак” чыга башлаганнан бирле мин аның белән. Башта уйларым, хыялларым, соңрак язмаларым белән аңа кушылдым”, – ди журналист, "Акчарлак" газетасының чыгарылыш буенча редакторы Нәзилә Хуҗина, үзе турында сорагач. Ачык, яхшы энергияле, гади, аралашырга яратучы кешеләр, аларның эшләре турында тәмләп яза. Аңа аеруча өлкән буын театр артистлары белән әңгәмәләр кору ошый. “Алар белән сөйләшкәч, эчке дөньям тагын да байый”, – ди ул. Интервью, репортаж жанрын үз итә. Вафатына ике ай кала, бөек шәхес Фәнис Яруллин белән очрашып, сөйләшеп кала алуын – иҗаты өчен бер плюс дип саный. Газетада “Яшьләр мәйданы”, “Унсигез яшем”, “Ир – баш, хатын – муен”, “Эсвежи хәбәрләр” сәхифәләрен алып бара.
Нәзилә артык күп сөйләшергә яратмый, үзе исә моны: “Сүз – ул энергия, миңа күбрәк кешене тыңлау ошый”, – ди. Редакциягә килүчеләр һәм телефоннан шалтыратучылар белән һәрвакыт сабыр гына, ягымлы итеп сөйләшә.
“Журналистикадан кала үземне башка һөнәр иясе итеп күз алдына да китерә алмыйм. Ходай язу сәләтемнән аермасын да, татар матбугаты мәңге яшәсен!” – ди ул көлеп.