Биография

Alt

Мин...

Сафин Габделфәт Габдрахман улы 1962 елның 11 октябрендә Татарстан республикасы Арча районы Симетбаш авылында туа. Бөек шагыйрь яшәгән һәм иҗат иткән Тукай–Кырлайдан нибары биш чакрым ераклыкта гына аның туган авылы.

Кырлай урта мәктәбен тәмамлаганнан соң Габделфәт Сафин Казан төзүче–инженерлар институтына укырга керә. Аны тәмамлагач төзүче-инженер белгечлеге буенча биш ел төзелештә эшли. Ләкин Габделфәт төзүче түгел, ә артист булып китә. «Ак күлмәгем» (И. Дәүләтшин муз., Ш. Җиһангирова сүз.) җыры аңа зур популярлык китерә. Аннан яңа җырлар, көтеп алынган альбомнар, шау-шулы җырлар, зур исемнәр… Габделфәт Сафин 20 альбом чыгара, 200дән артык җыр башкара, Татарстанда, Мәскәүдә, Санкт-Петербургта, Себердә, Пермьдә, Ижевскида, Саратовта, Йошкар-Олада, Уфа һәм Башкортстан шәһәрләрендә, Чиләбедә, Ектеринбургта, Самарада һәм башка күп шәһәрләрдә концертлар бирә.

2001 елның 23 февралендә Татарстан республикасы Президенты указы нигезендә, Сафин Габделфәт Габдрахман улына татар музыкаль-эстрада сәнгате өлкәсенә керткән өлеше өчен «Татарстанның халык артисты» дигән мактаулы исем бирелә.

Габделфәт Сафин бүгенге көндә уңышлы эшләп килүче эшмәкәр дә. Менә инде берничә ел ул нәшрият эше белән шөгыльләнә. Аның «Акчарлак» исемле газетасы иң күп укылучы газета булып санала. Язылу тиражы 40 меңне тәшкил итә, ә "Акчарлак" нәшрият йортында чыгып килүче барлык басмаларның тиражы 90 меңнән артып китә.

Габделфәт Сафин гаилә җанлы кеше. Яраткан хатыны Рузилә белән кызлары Әдилә һәм уллары Зөлфәтне тәрбияләп үстерәләр. Әдилә – "Акчарлак" нәшрият йортында эшли, Зөлфәт – 11 сыйныфны тәмамлап, КФУның маркетинг бүлегенә укырга керде. Җырчы өчен гаилә – төп терәк.

Тормыш баскычлары

1980 – Г. Тукай исемендәге Кырлай урта мәктәбен тәмамлау;

1987 – КТИИны тәмамлау;

1988 – өйләнү;

1992 – Казанда яңа 4 бүлмәле фатирга күченү;

1992 – Г. Тукай ис. Татарстан дәүләт филармониясендә эшли башлау;

1993 – «Ак күлмәгем» хиты туа;

1993 – «Татар җыры-93» конкурсы дипломанты;

1994 – «Габделфәт» иҗат берләшмәсе төзелә;

2000 – «Татар җыры-2000» фестивалендә «Хыянәт» җыры өчен «Алтын Барс» премиясе лауреаты;

2001 – «Татар җыры-2001» фестивалендә «Соңгы кыңгырау» җыры өчен «Алтын Барс» премиясе лауреаты;